Հանդիպում հայազգի բժիշկ-գիտնականի հետ

Գաղտնիք չէ, որ աշխարհի տարբեր երկրների, մասնավորապես, Ռուսաստանի Դաշնության առաջադիմական կլինիկաներում աշխատում են աշխարհահռչակ հայ բժիշկ գիտնականներ, որոնց ներդրումը բժշկագիտության առաջընթացին և մարդկանց առողջության վերականգնման գործում անգնահատելի է:

Այդ գիտնականներից է Ռուսաստանի Դաշնության բժշկագիտության ակադեմիայի Ա.Բակուլևի անվան սիրտ-անոթային վիրաբուժության գիտական կենտրոնի ռենտգենոներանոթային ախտորոշման և բուժման բաժնի ղեկավար, Ռուսաստանի Դաշնության առողջապահության նախարարության ռենտգենոներանոթային ախտորոշման և բուժման գծով գլխավոր մասնագետ, Ռուսաստանի Դաշնության բժշկագիտության ակադեմիայի իսկական անդամ պրոֆեսոր Բագրատ Ալեքյանը, ում հյուրընկալել էին մայրաքաղաքի «Էրեբունի» բժշկական կենտրոնի սրտաբանները: 

Կենտրոնի տնօրեն Արթուր Ռոստոմյանը, ներկաների անունից ողջունելով հյուրին, շնորհավորեց նրան Հայաստանի Հանրապետության ԳԱԱ-ի պատվավոր ակադեմիկոսի կոչում շնորհելու առիթով, միաժամանակ նշեց, որ տվալ հանդիպումը բժշկական կենտրոնի սրտաբանների համար բժշկագիտական նորագույն տեղեկատվություն ստանալու հրաշալի միջոց է, որովհետև թեման առավելապես առնչվում է սիրտ-անոթային հիվանդությունների ախտորոշման և բուժման գերժամանակակից մոտեցումներին, ինչը լիովին հակադրվում է ներկայումս գործող բուժման պահպանողական ռազմավարությանը: 

Բ.Ալեքյանն անկեղծորեն խոստովանեց, որ հայ սրտաբանների այսօրվա որոնումներն ու կատարած աշխատանքը շատ կողմերով գոհացուցիչ է, սակայն սուր կորոնար ախտանիշի դեպքում րոպեների հապաղումը կարող է ողբերգական հետևանքների հանգեցնել: «Այս ախտանիշը շատերն են կրում և այնպես, ինչպես մենք էինք մինչև օրս  բուժում ուղղակի արգահատելի է, որովհետև առաջավոր տեխնոլոգիաների և ինտենսիվ բժշկության մեր դարում բուժման պահպանողական ռազմավարությունն այլևս անընդունելի է»,- հավելեց նա: Գիտնական բժիշկն ավելորդ չհամարեց ընդգծել, որ ամեն մի տարածաշրջան իր յուրահատկություններն ունի, հատկապես, երբ խոսքը սուր և իշեմիկ ինսուլտների, սրտի կաթվածի մասին է: 

Ռուսաստանի Դաշնությունում սիրտ-անոթային հիվանդությամբ տառապողների օրինակով Բ.Ալեքյանը ներկայացրեց վիճակագրական որոշ տվյալներ: Նրա փաստարկներով կաթված ստացվածների 45%-ը մահանում է առաջին իսկ տարում և հիմնական պատճառը ոչ միայն հապաղումն է (կաթված ստացվածներին օգնություն պետք է ցուցաբերել 30 րոպեից ոչ ուշ): Բնական է, որ առանց կորոնոգրաֆիայի մահացության տոկոսը բարձր կլինի: Մինչդեռ սրտի պսակաձև անոթների առաջին շունտավորումը հնարավորություն կընձեռի փրկելու մարդկային կյանքեր: Բ.Ալեքյանը նշեց, որ Ռուսաստանի Դաշնությունում այս կարևոր հիմնահարցը լուծված է. պետությունը յուրաքանչյուր հիվանդի համար տրամադրում է 1300-1500 ԱՄՆ դոլար:

«Էրեբունի» բժշկական կենտրոնի անգիոգրաֆիկ ծառայությունն անվանակոչվեց ակադեմիկոս Բագրատ Ալեքյանի անունով: 

Հարցեր, պատասխաններ, մեկնաբանություններ